Kvennakórinn Vox Feminae var stofnaður haustið 1993 af Margréti J. Pálmadóttur. Markmiðið með stofnun Vox Feminae var að syngja eldri tónlist, andlega og veraldlega. Kórinn hefur haldið sjálfstæða tónleika einu sinni til tvisvar á ári. Einnig hefur hann tekið þátt í fjölmörgum tónleikum Kvennakórs Reykjavíkur, m.a. í velheppnaðri söngferð til Ítalíu 1996, og farið í sjálfstæðar tónleikaferðir til Austurríkis (1997) og Þýskalands (1998). Kórinn söng einnig með Sinfoníuhljómsveit Íslands 1998. Í kórnum starfa nú um 40 konur.

Aðalstjórnandi frá upphafi hefur verið Margrét J. Pálmadóttir, og einnig hafa Arnhildur Valgarðsdóttir, Rut Magnússon, Sigríður Ella Magnúsdóttir, Sibyl Urbancic og Svana Víkingsdóttir unnið með kórnum.

Í dag er Margrét Jóhanna Pálmadóttir stjórnandi Vox Feminae. Hún hóf tónlistarferil sinn barnung í Hafnarfirði, söng þá með kór Öldutúnsskóla og Barnakór Þjóðkirkjunnar í Hafnarfirði. Hún stundaði síðan einsöngsnám hjá Elísabetu Erlingsdóttur í Tónlistarskóla Kópavogs, en einnig í Vínarborg, Söngskólanum í Reykjavík og á Ítalíu undir leiðsögn meðal annarra: Svanhvítar Egilsdóttur, Þuríðar Pálsdóttur, Linu Pagliughi og Eugeniu Ratti. Hún stofnaði og stjórnaði Kór Flensborgarskóla og Starfsmannakór SFR, að auki stofnaði hún Kvennakór Reykjavíkur, Vox Feminae og Barnakór Grensáskirkju, Stúlknakór Reykjavíkur og er nú stjórnandi þriggja síðastnefndu kóranna ásamt Gospel systrum Kvennakórs Reykjavíkur.

Á síðasta starfsári fór kórinn í tónleikaferð um Norðurland, hélt jólatónleika í Háteigskirkju, hélt Vínartónleika í mars, tók í norrænu kvennakóramóti í apríl og lauk síðan starfsárinu með þátttöku í kristnihátíð á Þingvöllum. Ennfremur lauk kórinn við upptöku geisladisks. Á því starfsári sem nú fer í hönd hyggst kórinn gefa út geisladisk sem kórinn lauk við upptöku á, á síðasta starfsári. Geisladiskurinn inniheldur eingöngu íslensk þjóðlög og sönglög fyrir kvennakóra.

Um miðjan nóvember n.k. mun kórinn síðan halda í sína fyrstu kórakeppni en hann hefur fengið inngöngu í VIII Alþjóðlegu kórakeppnina í kirkjulegri tónlist sem haldin er í nafni tónskáldsins Giovanni Pierluigi Da Palestrina í Vatikaninu í Róm. Í keppninni mun kórinn flytja tvö verk eftir Palestrina og eitt verk að eigin vali og hefur tónskáldið John Speight hefur samið kirkjulegt verk "Beatus Vir" sérstaklega fyrir Vox Feminae og Margréti Pálmadóttur sem kórinn mun frumflytja í keppninni.

Í stjórn Vox Feminae eru Anna Birgitta Bóasdóttir, Eygló Rúnarsdóttir, Hallveig Andrésdóttir og Sigurbjörg Aðalsteinsdóttir Raddformenn næsta starfsár eru: Guðný Jónsdóttir, 1. sópran, Áslaug Íris Friðjónsdóttir 2. sópran, Þorgerður Valdimarsdóttir, 1. alt, Helga Arngrímsdóttir, 2. alt Nótnastjóri er Þórdís Guðmundsdóttir.

Símanúmer Vox Feminae er : 863-4404

Aftur á aðalsíðu Domus Vox